Endamên komîteya birêvebirina konferansa standardbûna zimanê Kurdî li Amedê !
Bêwar Ibrahîm

( 17-18/11/2005 )
Beşdarên bi rûmet û hêja !
Bê guman ! Bi birûskekê , an bi pîrozbahiyekê , an bi Emil û telefonekê ... Em nikarin kêf û şadûmaniya hest û dilê xwe ,geşî û germahiya mejî û ramanên xwe berz û eşkere bikin ; Derbarî vê pêngava bi nirx û buha ji bo hinekî werîsê ezezîtiyê ji dora gerdena zimanê Kurdî hêdî ... hêdî sist bibe û girêkên asê bi yek carê vebin .. Ev werîsê ku dijmnê Kurdayetiyê bi sîstemeke bi rêk û pêk û pilanên dûrdîtî li gerdena zimanê me yê şêrîn gerandiye, bê ku bêhnvedanê bidê ku hinekî hilma xwe bide û bistîne ...
Miletê Kurd ji hev tarûmar kirin û sed mixabin ! her aliyek ma girêdayî bi zaravê herêm û deverên ku lê dijîn , wisa dara zimanê Kurdî qurquçandin û her şitlek di xaka xwe de ma ..Lê dijminê vî zimanî hesabê kok û rehan nekir nizanîbû ku bi darê zorê nikare zimanê Kurdî ji ser zarê dayik û bavan bimalîne û rehên ku bi xwînê avdayî ji bênderên cerg û dilên wefadaran ji qurm ve rake ; bi saya dilsoz , wefadr û hezkerên vî zimanê delal û zengîn windabûnê riya xwe ji ser dagerand û perçên wî yên ji hev çiryayî hêdî ...hêdî nêzîkî hevbûn.. Qonaxa herî geş û bengîniya herî xweş ,ji zimanê Kurdî re li ser rûpelên Kovara ( Hawar ) a Mîr Celadet Bedir-Xan bû .. Bi rastî zimanê Kurdî bibû kolkezêrîn di asmanê Kurdistanê de , hawar û qêrînên pênûsên sembolên edebiyata Kurdî rûpelên kovara ( Hawar ) ê disotandin ji bo standarda ziman û di serê wan de Mîr Celadet Bedir-Xan û Tewfîq Wehbî Beg .
Di hejmara 10 ê de ji kovara ( Hawar ) ê Seydayê Pêrût hawar dike û dibêje :( Bê guman le zimanê Kurdî de hezaran kilme wa heye lehemû lehcekan de maneyan yeke û ferqiyan niye . heta bitwanrêt meqalat be ...
Hinde kilmê lehceyê Babanî tê bixrêtke mumkin bit Soran û Botan bi qirîne tê bigin û dîsan hendê kilmê way Kurdistanê şimal be kelk bihnêrit ke Kurdê cinûb bitwanin be qirîne le maneyekê halê bibin ...
Min Omîdim waye eger Hawar a xoşewîst bo midetekî minasib li ser em rêgaye webiriwa usa lehceyeke mişterikê Kurdî damezirêt ... ) .
Di dema îro de gelek nivîskar û helbestvanên Kurd dibêjin : Xwezî me bi sed zimanan zanîba ji bo me karîba bi wan zimanan binîvisanda ?!
Lê ez her dem û kêlîk ji Xwedê dixazim û dibêjim û rece û tika dikim ji cenabên we zimanzanan re jî dibêjim : Xwezî min bi hezar zimanî zanîba ji bo min bi wan zimanan bixwenda û bixwenda û dîsan bixwenda û di serencamê de min deriyê xezîna vê xwendinê bi tenê li ber zimanê Kurdî vekiriba û binîvisanda .
Ev pêngav ji bo standardbûna zimanê Kurdî pir dereng ma , lê derengî ji nehatinê çaktire , sed xwezî bi wê roja ku Qamişlo , Amed(Diyarbekir) , Mehabad û Hewlêr li ber siya yek zimanî bibin yek bend û yek deng , ev tixub û têldirên mayinkirî ku dijmin li ser bedena Kurdistanê çandine bi standarda zimanê Kurdî biçinin û bimalînin .
Her bijî zimanê Kurdî , serketin û pêşketin ji bo konferansa standardbûna zimanê Kurdî.. Destê Xwedê li pişta we be di gel rêz û silavên gerim ji nûneritiya PEN a Kurdî li Binxetê .

Nûnera PEN a Kurd li Qamişlo
Bêwar Ibrahîm
Qamişlo 15/11/2005