Pîrozbahiya Festîvala Rewşenbîrî Li Duhokê

Seydayê hêja Hesen Silîvanî
Serokê yekitiya Nivîskarên Kurd li Duhokê !
Endamên komîteya Festîvala Duhokê ya rewşenbîrî !
Beşdarên bi rûmet û dilsoz !

Bi navê Bîroya PENa Kurd li Başûr- rojavayê Kurdistanê (Binxetê) silav û rêzên germ ji kelkela germa payiza Qamişloka wêrek û cegerdar ...

Birayên hêja û delal !

Bayê payiza Êlûnê ne bayekî rêwîye , ne bêware , ne sêwiye ... Asmanê Kurdistanê jê re bane û xaka wê make û hêwane ... êlûn bi roj û şevên xwe , bi sayî û bahozên xwe , bi rok û toza xwe bûye Avesta diwem di dîroka netewa Kurd de . Îro dema civîn û şevbuhêrkên rewşenbîrî di sînga vê  meha pîroz de li dar dikeve xwîna şehîdên şoreşa êlûnê difûre , digurnije û dikene bi rêka fûrandin û kenê pênûsên nivîskar û helbestvanan ... Belê kenê herî bilind wê ji pênûsên  peşmergeyên ku helbestên xwe

 di pala çiya û di hindirê gelî û newalan de dinîvisandin. Ev pênûsên ku ta roja îro kefenên xwe dikin pelên spî û bi mêranî li ser sînga mirinê dikenin ...

Birayên bi rûmet û dilsoz !

 Pênûs pêxemberê aqile û zimanê zanînê ye ..., lê ziman nasnama kesayetiya mirovane her kes bi zimanê xwe tê nasîn daxwaz û hêvîyên me ji Kurdistana azade ku zimanê Kurdî bike projeyê yekem di pêvajoya lêkirin û avakirinê de .

Berê ziman berekî gewreye di şoreşa cîhangeriyê de. Serketina di vî berî de wê vejîn û geşiyê bide dara helbest , çîrok û romanê ..., îro tixûb û sînoran welatên Ereban ji hev cuda dikin lê zimanê standard wan dikin yek welat ...

Birayên delal ! li darxistina wisa Festîval destpêka gava yekeme , rê dirêje û tîna roja sebir û aramiyê pir dijware .. Pêwîste em dara deyaxê bê av nehêlin û serê pênûsên rast û resen di binê bêrîkên  jibîrkirinê de zingargirtî nehêlin .

Di hembêza Êlûnê de wê bayê helbestê li dara hestên razayî bide û li ser dengê zingilê Festîvala we rewşenbîrên bi rûmet û dilsoz şiyar bibe û  li hola hestê zelal ,afrêner û peyva resen bicive li xwendina bilbilên wêrek guhdar bibe , emê pala xwe bidin stûna bê miradan li gelyê Laleşê ku Xwedê herêma Kurdistanê ji destên xeraban biparêze . Her û her hest û huner û helbest li ber siya ala azadiya wê konger û Festîvalên xwe li darxînin .

Careke din bi navê bîroya  PEN a Kurd li başûr-Rojavayê Kurdistanê em Festîvala Duhokê ya  Rewşenbîrî pîroz dikin di gel hêvîyên serketin û şadûmaniyê û tev bimînin di xêr û xweşiyê de .

Bêwar Ibrahîm

Nûnera PENa KURD li Rojava/Binxetê