Girtina çalakvanên kurd li Sûriyê berdewam dike

Rêcîma partiya Baas li Sûriyê girtina çalakvanên kurd li Kurdistana Sûriyê berdewam dike.
Li pey daxuyaniya Rêxistina Mafê Mirovên Kurd li Sûriyê (MAF), hêzên ewlekariya leşkerî li Qamişloyê, seat 2.30 sibeha roja 18.11.2005 bi yekîneyeke çekdar êrîşî mala çalakvanê kurd Mehmûd Yûsiv Seyid Yûsiv kirin. Piştî ku hêza istixbaratan dîwarê hewşa wî herfiandin, ew bi şêweyekî hov derbasî malê bûn, mal ser û bin kirin û Mehmûd Yûsiv girtin.

(MAF) di daxuyaniya xwe de eşkere dike ku bi tenê piştî hiştina wî bi çend seatan di girtîgeha Qmişloyê de, hêzên ewlekariyê girtiyê kurd Mehmûd Yûsiv rakirin beşê lêkolîn û lêpirsînê li paytexta Sûriyê Şamê.

Ta nuha tu agehdarî derbarey rewşa Mehmûd Yûsiv ya di girtîgehê de negihiştine destê malbata wî.

Mehmûd Yûsiv çalakvanekî kurd û endamê Partiya Çep ya Kurdî li Sûriyê ye. Ew di sala 1969ê de ji dayik bû ye, zewicî ye û bavê çend zarokan e.

Ji hêleke dî ve, di 17.11.2005ê de hêzeke çekdar ji beşê ewlekariya dewletê li Qamişloyê çalakvanê kurd Nesreldîn Ehmê li cihê karê wî li başûrê bajêr girt. Piştî girtina wî bi nêzîka seatekê hêzêke çekdar ya istixbaratan êrîşê mala wî kir, mal ser û bin kirin û hin wêne û belgeyên şexsî bi xwe re birin.

Nesreldîn Ehmê di sala 1971ê de ji dayik bû ye, zewicî ye û ew bavê 3 zarokan e. Ew bi taybetî di komên folklorî yên kurdî li Qamişloyê çalak bû. Di dema dawî de bibû birêvebirê Koma Qamişlo ya Folklora Kurdî:


Girtina herdû çalakvanên kurd nîşana tundî û hovîtiya rêcîma Sûriyê ye û rastiya wê yekê ye jî ku ev rêcîm dê qet tu gavan ber bi misogerkirina mafê kurdan de neavêje.



Û her weha Istixbaratên Sûriyê lêkolînê bi zarokekî kurd yê 8 salî re dikin

Endamên istixbarat Sûriyê lêkolîn bi zarokekî kurd yê 8 salî re kirin. Piştî girtina bavê wî bi rojekê, çend endamên dezegha istixbaratên Sûriyê zarokê kurd Nesredîn Ehmê ( jidayekbûn 1997) bi dizî, bê agehdarkirina malbata wî ji kolana ku mala wan lê ye dibin û lêkolînekê pê re dikin. Endamên istixbaratan ji bo ku bikaribin ragehandinan ji Raman bistînin, 1000 (hezar) lîreyên sûrî dixin destê wî de û jê re dibêjin ku ew hevalên bavê wî ne û wî ev pere jê re birêkirine. Di nav lêkolîna bi Raman re, endamên istixbaratên sûrî çend wêneyan nîşanî wî didin û jê dixwazin ku navê kesên di wêneyan de bibêje.

Bavê Raman Ehmê, çalakvanê kurd Nesredîn Ehmê di 17.11.2005ê de ji aliyê hêza ewlekariya dewletê ( yek ji bêtirî 17 beşên ewlekarî û istixbaratan li Sûriyê) ve hatibû girtin